குடும்ப நலனே எதிர்க்கட்சிகளின் கொள்கை

தங்கள் குடும்பத்தினர் நலனைக் காப்பது மட்டுமே எதிர்க்கட்சிகளின் கொள்கையாக உள்ளது. இதற்காகவே அவர்கள் ஆட்சி, அதிகாரத்தைக் கைப்பற்றத் துடிக்கிறார்கள் என்று பிரதமர் நரேந்திர மோடி விமர்சித்துப் பேசினார்.

- 

அதேநேரத்தில், மத்திய பாஜக அரசு அனைவருக்குமான வளர்ச்சி என்ற கொள்கையை நோக்கமாகக் கொண்டு ஆட்சி நடத்தி வருகிறது என்று அவர் தெரிவித்தார்.

உத்தர பிரதேசத்தின் தனது வாரணாசி மக்களவைத் தொகுதியில் வெள்ளிக்கிழமை ரூ.3,880 கோடி மதிப்பீட்டிலான 44 நலத் திட்டங்களை தொடங்கி வைத்தும், அடிக்கல் நாட்டியும் பிரதமர் மோடி பேசியதாவது:

நாட்டுச் சேவையாற்றுவதே பாஜக தலைமையிலான மத்திய அரசின் தாரக மந்திரமாக உள்ளது. 'அனைவரும் இணைந்து அனைவருக்குமான வளர்ச்சி' என்ற நோக்கத்துடன் நாம் நாட்டை தொடர்ந்து வலுவாக முன்னெடுத்துச் செல்கிறோம். நாட்டின் ஒவ்வொரு குடிமகனின் வாழ்வும் மேம்பட வேண்டும் என்ற உத்வேகத்தில் பயணிக்கிறோம்.

இதற்கு நேர்மாறாக தங்கள் குடும்பத்தினர் நலனைக் காப்பது மட்டுமே எதிர்க்கட்சிகளின் கொள்கையாக உள்ளது. இதற்காகவே அவர்கள் ஆட்சி, அதிகாரத்தைக் கைப்பற்றத் துடிக்கிறார்கள். அவர்கள் இரவும், பகலும் ஆதாய அரசியலை நடத்துகின்றனர். நாட்டு நலனில் அவர்களுக்கு துளியளவும் அக்கறையில்லை. குடும்ப ஆதரவு, குடும்ப வளர்ச்சி என்பதே அவர்களின் கொள்கை.