பேரவையில் பதாகை: அதிமுக உறுப்பினர்கள் 15 பேர் இடைநீக்கம்

பேரவையில் எதிர்க்கட்சித் தலைவர் பேச அனுமதி கோரி, அதிமுக உறுப்பினர்கள் கடுமையாகக் கூச்சல் எழுப்பினர். அப்போது, அனுமதியின்றி பதாகைகளைக் காண்பித்தவர்களில் அடையாளம் காணப்பட்ட 15 பேர் திங்கள்கிழமை ஒருநாள் இடைநீக்கம் செய்யப்பட்டனர்.

- 

சென்னை, ஏப். 7:

சட்டப்பேரவையில் திங்கள்கிழமை கேள்வி நேரத்துக்குப் பிறகு, நேரமில்லாத நேரத்தில் ஒரு பிரச்னையை எழுப்ப எதிர்க்கட்சித் தலைவர் எடப்பாடி கே.பழனிசாமி முயன்றார். அப்போது, ஆளும் கட்சி மற்றும் எதிர்க்கட்சித் தரப்பு இடையே கடுமையான வாக்குவாதம் ஏற்பட்டது. அதன் விவரம்:

பேரவைத் தலைவர் மு.அப்பாவு: எதிர்க்கட்சித் தலைவர் தெரிவித்த கருத்துகள் எதையும் அவைக் குறிப்பில் பதிவு செய்ய முடியாது.

அவை முன்னவர் துரைமுருகன்: எதிர்க்கட்சித் தலைவரான நீங்கள் பேரவையில் ஒரு பிரச்னையை எழுப்பலாம். ஆனால், நீங்கள் இப்போது எழுப்பும் பிரச்னை நீதிமன்றத்தில் உள்ளது. எனவே, இங்கே அதை எழுப்ப முடியாது.

பேரவைத் தலைவர்: ஸ்டெர்லைட் விவகாரத்தை 2018-ஆம் ஆண்டு ஜூன் 7-ஆம் தேதி அப்போதைய எதிர்க்கட்சித் தலைவரான மு.க.ஸ்டாலின் எழுப்ப முயன்றார். அப்போது, உயர்நீதிமன்றத்தில் வழக்கு இருப்பதால் எழுப்ப முடியாது என்றனர். அது தொடர்பாக கருத்தைப் பதிவு செய்யக்கூட விடவில்லை. அன்று வெளிநடப்பு செய்தது மட்டுமே பதிவு செய்யப்பட்டது. அதே நிலைதான் இன்றும் தொடரும். விதி 92 (1)-இன்படி, நீதிமன்றத்தில் உள்ள பொருள் குறித்துப் பேச அனுமதியில்லை.