சிரியா: கிளர்ச்சியாளர்களிடம் வீழ்ந்தது அலெப்போ நகரம்

டமாஸ்கஸ், டிச. 2: சிரியாவின் இரண்டாவது பெரிய நகரான அலெப்போவை மேற்கத்திய ஆதரவு கிளர்ச்சியாளர்கள் கைப்பற்றியுள்ளனர்.

- 

அதையடுத்து, கிளர்ச்சியாளர்களுக்கு எதிராக ரஷியா மற்றும் சிரியா விமானங்கள் தாக்குதல் நடத்தி வருகின்றன. போரில் அரசுப் படையினருக்கு பலம் சேர்ப்பதற்காக இராக்கிலிருந்து ஈரான் ஆதரவு படையினர் சிரியா வந்துள்ளனர்.

கடந்த 2011-ஆம் ஆண்டு பல்வேறு அரபு நாடுகளில் அரசுக்கு எதிரான போராட்டங்கள் நடைபெற்றன. 'அரபு வசந்தம்' என்றழைக்கப்படும் அந்தக் கிளர்ச்சியின் ஒரு பகுதியாக, சிரியாவிலும் அல்-அஸாத் அரசுக்கு எதிராக போராட்டங்கள் நடைபெற்றன.

அந்தப் போராட்டத்தை துப்பாக்கிச்சூடு உள்ளிட்ட அடக்குமுறை மூலம் அல்-அஸாத் அரசு அடக்கியது. அதையடுத்து, அந்தப் போராட்டம் உள்நாட்டுப் போராக உருவெடுத்தது.

ரஷியா ஆதரவு நிலைப்பாட்டைக் கொண்டிருந்த அல்-அஸாதின் அரசை அகற்றுவதற்காக, பல்வேறு ஆயுதக் குழுக்களுக்கு அமெரிக்கா உள்ளிட்ட மேற்கத்திய நாடுகள் ஆயுத மற்றும் நிதியுதவி அளித்தன. அதே நேரம், அரசுப் படைகளுக்கு ஆதரவாக ரஷியா செயல்பட்டது.