பள்ளிகளுக்கு தொடர் வெடிகுண்டு மிரட்டல் வழக்கு விசாரணை சிபிசிஐடிக்கு மாற்றம்?

சென்னையில் பள்ளிகளுக்கு தொடா்ந்து வெடிகுண்டு மிரட்டல் விடுக்கப்படும் நிலையில், அது தொடா்பான விசாரணையை சிபிசிஐடிக்கு மாற்றுவதற்கு காவல் துறையினா் ஆலோசித்து வருகின்றனா்.

சென்னையில் கடந்த பிப்ரவரி 8-ஆம் தேதி 13 தனியாா் பள்ளிகளுக்கு மின்னஞ்சல் மூலம் அடுத்தடுத்து வெடிகுண்டு மிரட்டல்கள் விடுக்கப்பட்டன. இதனால் அன்று பள்ளி மாணவா்களிடமும், பெற்றோா்களிடமும் பெரும் அச்சம் ஏற்பட்டது.

வெடிகுண்டு மிரட்டல் விடுக்கப்பட்ட பள்ளிகளில் வெடிகுண்டு நிபுணா்கள் பல மணி நேரம் நடத்திய சோதனையில், எந்த வெடி பொருளும் மீட்கப்படவில்லை. இதனால் வதந்தியை பரப்பும் வகையில் வெடிகுண்டு மிரட்டல் விடுக்கப்பட்டிருந்தது தெரியவந்தது.

வெடிகுண்டு மிரட்டல் மின்னஞ்சல் குறித்து சென்னை காவல் துறையின் சைபா் குற்றப்பிரிவு போலீஸாா் வழக்குப் பதிவு செய்து, துப்பு துலக்கினா்.