దేశానికే 'పెద్దన్న'!

ఒక్క అంకె సంఖ్యల్లో అతిపెద్దది తొమ్మిది. నవ వసంతాలు పూర్తిచేసుకున్న తెలంగాణ ఇప్పుడు ఎన్నో రంగాల్లో పెద్దది. సాగుబడిలో ఇక్కడ రైతే రాజు.

ఒక్క అంకె సంఖ్యల్లో అతిపెద్దది తొమ్మిది. నవ వసంతాలు పూర్తిచేసుకున్న తెలంగాణ ఇప్పుడు ఎన్నో రంగాల్లో పెద్దది. సాగుబడిలో ఇక్కడ రైతే రాజు. ఏలుబడిలో ఉన్నది మనసున్న మారాజు. అందుకే, తెలంగాణ సంపద సృష్టిలో గొప్పది. సంక్షేమంలో ఆదర్శంగా నిలిచింది. ఐటీ ఎగుమతుల్లో ప్రపంచాన్ని ఆకర్షించింది. స్టార్టప్ దునియాలో దిక్సూచిగా ఎదిగింది. దశ దిశలా పురోగతితో దశాబ్ది ఉత్సవాలకు సిద్ధమైంది.ఇతర రాష్ట్రాలకు చాలా విషయాల్లో ఇప్పుడు తెలంగాణ పెద్దన్న, రాష్ట్రాన్ని దేశానికి చుక్కానిగా తీర్చిదిద్దిన ఘనత మన పెద్దన్న, తెలంగాణ తల్లి పెద్దబిడ్డ ముఖ్యమంత్రి కేసీఆర్కే దక్కుతుంది.

తొమ్మిదేండ్ల కిందట.. చెరువుకు ఏముంది పరువు. చెరువుగట్టుకు ఎక్కడుంది బలం. తాంబాలామంటి చెరువు పావు వంతు నిండిందో లేదో కట్ట తెగిపోయేది.ఏడాదంతా చెరువు నెర్రెలు వారి పడావు భూమిని తలపించేది.చిన్నపిల్లలు క్రికెట్ ఆడుకునే మైదానంగా రూపాంతరం చెందేది.

మరిప్పుడు... చెరువుకు చేవ వచ్చింది. కట్ట గట్టిపడ్డది. మండువేసవిలోనూ మత్తళ్లు దూకుతున్న చెరువులు జలజయధ్వానాలు వినిపిస్తున్నాయి. ఈ సుజల దృశ్యం ఒక్క మాటతో మొదలైంది. గతి తప్పిన గొలుసుకట్టు చెరువులను సంస్కరించుకోవాలన్న ముఖ్యమంత్రి పట్టుదలతో సాధ్యమైంది. తెలంగాణ ప్రభుత్వం దీక్షతో చేపట్టిన మిషన్ కాకతీయ తటాకాలకు మహర్దశ తెచ్చింది.

త్రిగుళ్ల రాము