ലോകം സാമ്പത്തിക അതിശൈത്യത്തിലേക്ക്

ലോകത്തെ മിക്ക സമ്പദ്വ്യവസ്ഥകളും കിതച്ചുകൊണ്ടിരിക്കുകയാണ്. വിലക്കയറ്റവും തൊഴിലില്ലായ്മയും കൊണ്ട് ജനം നട്ടംതിരിയുന്നു. രാജ്യങ്ങളെ അപ്പാടെ വിഴുങ്ങാൻ കെല്പുള്ള സാമ്പത്തിക കൊടുംശൈത്യത്തിലേക്കാണ് ലോകം നീങ്ങുന്നത്. ഒരുപക്ഷേ, 2008,2020 വർഷങ്ങളിലുണ്ടായതിനെക്കാൾ മാരകമായിരിക്കും ഈ അവസ്ഥ

- നബില ഹനീഫ്

ആഗോള സാമ്പത്തിക ആരോഗ്യനിലയറിയാൻ സാമ്പത്തികഭീമന്മാരായ അമേരിക്കയുടെയും ചൈനയുടെയും പിന്നെ, പ്രമുഖ യൂറോപ്യൻ രാജ്യങ്ങളുടെയും കിതപ്പളന്നാൽ മതി. കഴിഞ്ഞ ഏപ്രിൽ മുതൽ കാര്യങ്ങളത്ര ശുഭകരമായല്ല പ്രതിഫലിക്കുന്നത്. ആഗോള വ്യവസായവളർച്ചയിലെ കൂറ്റൻ പതനം തന്നെ നോക്കുക. 2021-22-ൽ 61 ശതമാനമുണ്ടായിരുന്ന വളർച്ചനിരക്ക് 3.2 ശതമാനത്തിലേക്കാണ് ഇടിഞ്ഞത്. ചില്ലറ മൊത്ത വ്യാപാരമേഖലകളിലുണ്ടായ ക്രമാതീതമായ വിലക്കയറ്റവും ഉയർന്ന പലിശനിരക്കും വന്മരങ്ങളെയെല്ലാം ബുദ്ധിമുട്ടിലാക്കിയിട്ടുണ്ട്.

ഫെഡറൽ റിസർവിന്റെ കടുത്ത സാമ്പത്തികനയവും ശരാശരി അമേരിക്കൻ വീട്ടിലെ വരുമാനശോഷണവും യു.എസ്. സാമ്പത്തികവളർച്ചനിരക്കിന്റെ ഗതി ഈ വർഷം 2.3 ശതമാനത്തിൽ നിന്ന് അടുത്തവർഷം ഒരു ശതമാനത്തിലേക്ക് കുറയുമെന്നാണ് പ്രതീക്ഷിക്കുന്നത്. കോവിഡ് മഹാമാരിയും അനുബന്ധ ലോക്ഡൗൺ ശൃംഖലയും ചൈനയെ നട്ടംതിരിക്കുകയും നിലവിൽ തുടരുന്ന യുക്രൈൻ യുദ്ധവും അടിക്കടിയുള്ള ഭരണ മാറ്റവും കുത്തനെ കയറുന്ന എണ്ണ -പ്രകൃതിവാതക വിലയും യൂറോപ്യൻ രാജ്യങ്ങളെ ശ്വാസം മുട്ടിക്കുകയാണ്.

സാമ്പത്തിക മാന്ദ്യത്തിന്റെ ആക്കം കൂട്ടാൻ ഭക്ഷ്യ ഊർജവിലക്കയറ്റത്തിന്റെ രൂപത്തിൽ പണപ്പെരുപ്പവും ഒപ്പമെത്തി. ഈ സാമ്പത്തിക ദുർനിമിത്തങ്ങളെല്ലാംതന്നെ ലോകരാജ്യങ്ങളെ അപ്പാടെ വിഴുങ്ങാൻ കെല്പുള്ള കൊടും ശൈത്യത്തിലേക്കാണ് ചൂണ്ടിക്കാണിക്കുന്നത്; ഒരുപക്ഷേ, 2008, 2020 വർഷങ്ങളിലുണ്ടായതിനെക്കാൾ മാരകമായത്.

അർഥശാസ്ത്രവിദഗ്ധർ 98 ശതമാനം സംഭാവ്യതയാണ് മാന്ദ്യത്തിന് കല്പിച്ചിരിക്കുന്നത്.

വില്ലാളിവീരൻ ഡോളർ

ചുക്കില്ലാത്ത കഷായമില്ലെന്ന് പറയുന്നതുപോലെയാണ് ആഗോളവിപണിയിൽ ഡോള റില്ലാതെ വിനിമയം. ഡോളറിന്റെ അതികായപരിവേഷമാണ് നിലവിലെ സാമ്പത്തിക ഞെരുക്കത്തിന്റെ ആണിക്കല്ല്. കഴിഞ്ഞ രണ്ടുദശാബ്ദത്തിലെ ഏറ്റവും ശക്തമായ നിരക്കിലാണ് ഇന്ന് ഡോളർ. കഴിഞ്ഞ മാർച്ചുമുതൽ ഫെഡറൽ റിസർവ് ബാങ്ക് നിരക്കിൽ വൻവർധനയാണ് നടത്തിയിരിക്കുന്നത്. ഉയർന്ന പലിശനിരക്കിൽ യു.എസ്. ഗവൺമെന്റ് ബോണ്ടുകളാണ് ഏതൊരു നിക്ഷേപകനും കണ്ണുവയ്ക്കുന്നത്; അത് മഹാമാരിയിലായാലും യുദ്ധത്തിനിടയ്ക്കായാലും.