ભૂલી જજો કે તમારી દીકરી છું..

માનવતાના ટુકડેટુકડા કરતી ઘટના.. જે પુરુષ સાથે રહેવા ઘર, પરિવાર, શહેર સાથે સંબંધ તોડી નાખ્યો એ જ નરાધમે એની જીવનદોરી નિઘૃણ રીતે તોડી.

૨૭ વર્ષની શ્રદ્ધા, ૨૮ વર્ષનો એનો પ્રેમી આફતાબ.. ત્રણેક વર્ષ પહેલાં આફતાબ પૂનાવાલા અને શ્રદ્ધા વાલકર એક ડેટિંગ ઍપ પર મળ્યાં, પછી રૂબરૂ. બન્ને મુંબઈમાં રહે. શ્રદ્ધા મુંબઈના પરા મલાડના એક કૉલ સેન્ટરમાં નોકરી કરતી. શેફમાંથી ફોટોગ્રાફર બનેલો આફતાબ ફૂડ વ્લોગ (વાનગીવિષયક વિડિયો) બનાવી યુટ્યૂબ પર મૂકતો. ધીરે ધીરે સંબંધ આગળ વધતાં ૨૦૧૯ના ઑક્ટોબરમાં લગ્ન કર્યા વિના બન્ને સાથે રહેવા માંડ્યાં. નૅચરલી શ્રદ્ધાના પરિવારને આ સંબંધ મંજૂર ન હોય. એમણે દીકરીને સમજાવવાની કોશિશ કરી, પણ એ ન માની, ઊલટું એ આફતાબ સાથે દિલ્હી શિફ્ટ થઈ ગઈ.

મુંબઈમાં શ્રદ્ધા એની માતા અને ભાઈ સાથે રહેતી. પિતા એમની સાથે નહોતા રહેતા. ૨૦૨૦માં શ્રદ્ધાની માતાનો દેહાંત થયો. પિતા-ભાઈ સાથે શ્રદ્ધાને બનતું, પણ આફતાબ સાથે રહેવા એણે આ સંબંધ તોડી નાખ્યા. એણે પિતાને કહ્યું કે હવે હું પચ્ચીસની છું, મારા નિર્ણય જાતે લઈ શકું છું. મને ભૂલી જજો.