ટેલર સ્વિફ્ટઃ અમેરિકન ગીતોની મહારાણી

ગયા વર્ષે ન્યૂ યૉર્ક યુનિવર્સિટીના એક વિભાગે ટેલર સ્વિફટના વિષયક આખો કોર્સ શરૂ કરેલો, જેમાં તેની કારકિર્દી, એને પ્રભાવિત કરનાર ગીતકારો જેવા મુદ્દા આવરી લેવાયેલા

- સ્પર્શ હાર્દિક

ગીતકાર-ગાયિકા ટેલર સ્વિફ્ટે શરૂ કરેલી અને હજુ પણ ચાલી રહેલી ‘ધી ઇરાસ ટૂર’ના ભાગરૂપે તે વિશ્વભરનાં પ્રમુખ શહેરોમાં કૉન્સર્ટ કરશે. ટિકિટના વેચાણ ઉપરાંત જે-તે શહેરોમાં ચાહકોનાં ટોળાંઓ ઊમટવાથી હોટેલ, રેસ્ટોરાં, પબ, ઇત્યાદિનો વેપાર વધ્યો છે. ચાહકો મોજથી પૈસા ખર્ચી રહ્યા છે. ત્યાંની ઇકોનોમીને ઇરાસ ટૂરે એ હદે પ્રભાવિત કરી કે માધ્યમોમાં ટેલરનોમિક્સ અને સ્વિફ્ટોનોમિક્સ જેવા શબ્દો કોઇન થયા છે. વધારામાં, ટેલરનું ગીત ‘ઑલ ટુ વૅલ’ સ્ટેન્ફર્ડ યુનિવર્સિટીના એક અભ્યાસક્રમમાં સામેલ થયેલું. આવતા વર્ષે ત્યાં કોમ્પ્યુટર સાયન્સની એક વિદ્યાર્થિની દસ સપ્તાહનો કોર્સ ‘છેલ્લી મહાન અમેરિકન ગીતકારઃ ઇરાસના માધ્યમથી ટેલર સ્વિફ્ટ સાથે સ્ટોરીટેલિંગ’ ભણાવશે. ગયા વર્ષે न्यू યૉર્ક યુનિવર્સિટીના એક વિભાગે ટેલર સ્વિફ્ટના વિષયક આખો કોર્સ શરૂ કરેલો, જેમાં તેની કારકિર્દી, એને પ્રભાવિત કરનાર ગીતકારો જેવા મુદ્દા આવરી લેવાયેલા. ટેક્સાસ યુનિવર્સિટી અને કેનેડિયન ક્વીન્સ યુનિવર્સિટીએ ટેલરનાં ગીતોને સાંસ્કૃતિક સંદર્ભોમાં સમજાવતાં, એની ગીતકળા અને એની સાંસ્કૃતિક અસરોનું વિશ્લેષણ કરતાં કોર્સ શરૂ કરેલા. મહાન અર્વાચીન ગાયક-ગીતકારોમાં ગણના પામતા બોબ ડિલનને ૨૦૧૬નું સાહિત્યનું નોબેલ પારિતોષિક મળેલું ત્યારે ઘણાંને આશ્ચર્ય થયેલું. બોબ ડિલન અન્યો જેવા સાહિત્યકાર ભલે નથી, પણ એમનાં ગીતોએ અમેરિકન સમાજના એક બહોળા વર્ગની સંવેદના ઝીલી છે. અલબત્ત, ટેલર સ્વિફ્ટને અત્યારથી બોબ ડિલનની કક્ષાએ મૂકવાની વાત નથી થઈ રહી, પરંતુ હજુ ચોત્રીસ વર્ષની થવા જઈ રહેલી ટેલરે પોતાની પેઢીનાં ગીતો ગાઈને ચાહકોમાં જે ઉન્માદ જગાવ્યો છે, એને ધ્યાનમાં લઈને યુનિવર્સિટીઓ પણ નાના પાયે એના સંગીત પરનું અધ્યયનકાર્ય શરૂ કરે એ નોંધવા જેવી ઘટના ખરી. અગાઉ લાના ડૅ રે, બિયૉન્સે, રિહાના, લૅડી ગાગા અને બ્રિટની સ્પિયર જેવી ગાયિકાઓને લગતા કોર્સ પણ શરૂ થયેલા. આ યાદીમાં ટેલર સ્વિફ્ટ નવું નામ છે.