નાઝી બિલિયોનર્સ

> જર્મનીના કેટલાક બિલિયોનર્સની હિટલરના કાળની કાળી વાતો > બીએમડબલ્યુ કાર બનાવનાર ક્વાંટ ફૅમિલી હિટલર સાથેની દોસ્તીને કારણે આગળ આવ્યું > પ્રથમ કોન્સન્ટ્રેશન કેમ્પ બનાવી હિટલરને પ્રસન્ન કરનાર હિમલરના ટેકેદાર ઉદ્યોગપતિઓનું એક મિત્ર-વર્તુળ હતું

- ગૌરાંગ અમીન

હિટલર ’ને નાઝીઓનાં કૃત્યોને સખત ’ને સતત જાકારો આપવાનો

એમના માટે ’ને વડે જે ધનવાન થયા એમને આવકારો આપવાનો?

જર્મની નામ પડે એટલે ભારતીય મન ’ને મગજમાં એન્જિનયરિંગ, સંસ્કૃત ’ને હિટલર જેવા અમુક ટૅગ ચમકવા માંડે. જર્મની સુંદર, સારો ’ને શક્તિશાળી દેશ છે તથા આપણો મિત્ર છે એવી ફીલિંગ ઘણાં ભારતીય હૃદયમાં રમતી હોય છે. કહેવાય છે કે કોઈ સ્ત્રીને તેની ઉંમર ના પૂછાય ’ને કોઈ જર્મન કંપનીએ ૧૯૩૩થી ૧૯૪૫ની વચ્ચે શું કર્યું તે ના પૂછાય. પશ્ચિમી ગોરાઓની ન્યૂઝ તેમ જ હિસ્ટ્રી સાથેની ગુપ્ત રતિક્રીડા આપણી દૃષ્ટિમાં પકડાય તો ચમત્કાર થયો કહેવાય. હા, એમનો કોઈ દર્શક એવું ક્યારેક જોઈ શકે છે. ડેવિડ ડી યોંના ‘નાઝી બિલિયોનર્સ' પુસ્તકમાં જર્મનીના અમુક અબજોપતિઓની હિટલરના કાળની કાળી વાસ્તવિક વાતો છે જેને દુનિયા વર્ષોથી ઇગ્નોર ’ને એવોઇડ કરે છે. એ મહાધનાઢ્યોએ નાઝી પક્ષના ઍક્ટિવ મેમ્બર ’ને સપોર્ટર બની મની ’ને પાવર પર કાબૂ મેળવ્યો. એ કંપનીઓ ’ને કુટુંબો આજે પણ અબજોમાં આળોટે છે. એક બિલિયનમાં નવ શૂન્ય હોય. એક ડૉલર બરાબર બ્યાશી કે ત્યાસી રૂપિયા થાય.