ગુજરાતમાં પ્રથમ વખત યોજાશે ‘એગ્રી સ્ટાર્ટઅપ એક્ઝિબિશન'

ગુજરાતના ખેડૂતો પાસે ખેતીની અવનવી પદ્ધતિ છે. તો સાથે જ અનેક પ્રકારની ખેતીની ઊપજ પણ છે. છતાંય ખેતીને પ્રોત્સાહિત કરવા માટેનું યોગ્ય પ્લેટફોર્મ નથી પરંતુ હવે ગુજરાતમાં પ્રથમ વાર એગ્રી સ્ટાર્ટઅપ એક્ઝિબિશનની તૈયારી કરવામાં આવી છે. આગામી ૨૧ અને ૨૨ જુલાઈએ જીટીયુ કેમ્પસમાં વિશાળ કાર્યક્રમનું આયોજન કરવામાં આવ્યું છે, ત્યારે આ વિશે જાણવું રસપ્રદ રહેશે.

- હેતલ રાવ

‘અમે તો જન્મજાત જ ખેડૂત અને ગમે એટલું ભણીએ તો પણ ખેતી વગર કંઈ ફાવે નહીં, પરંતુ હા, ખેતીમાં પ્રગતિ કરીએ છતાંય કમાણીમાં તો છીએ એમના એમ જ. અમારી અવનવી આવડત ક્યાં લોકો સુધી પહોંચે છે?’ આ વાત કરી રહ્યા છે ગુજરાતના યુવા ખેડૂત યોગિન પઢિયાર. તો સોફ્ટવેર એન્જિનિયરિંગનો અભ્યાસ કરી અનેક અવનવી ઍપ્લિકેશનનો આવિષ્કાર કરનાર ઋત્વિકા પટેલ કહે છે, ‘હું ખેતી સાથે પ્રત્યક્ષ નહીં, પરંતુ પરોક્ષ રીતે જોડાયેલી છું. જેની પાછળનું કારણ છે, મારી ખેતીલક્ષી ઍપ્લિકેશન, જેનો બહોળો ઉપયોગ કરી ખેડૂતોને અનેક લાભ થઈ શકે છે, પરંતુ મારા આ સ્ટાર્ટઅપને યોગ્ય દિશા મળી રહે તેવું કોઈ સ્પોટ નથી. આ બંને નવયુવાનની વાત પરથી એટલું તો નક્કી થાય છે કે ગુજરાતના ખેડૂતો ખેતીમાં નવી તકનીકનો ઉપયોગ કરી તેનો વિકાસ કરી રહ્યા છે, જ્યારે બીજી બાજુ ગેમ ઍપ્લિકેશનોથી હટીને આજના યુવાનો દેશના ખેડૂતોને આવકનું વિશાળ મેદાન મળી રહે તેવા પ્રયાસમાં પોતાના સ્ટાર્ટઅપ લઈને ઊભા છે, પરંતુ પ્રશ્ન હજુ પણ ત્યાંનો ત્યાં જ છે કે કેવી રીતે એગ્રીકલ્ચરને પ્રોત્સાહન આપી શકાય? તો તેનો જવાબ છે, એગ્રી સ્ટાર્ટઅપ એક્ઝિબિશન. જી હા, ગુજરાતમાં પ્રથમ વખત વિશાળ પાયે અમદાવાદના જીટીયુ કેમ્પસમાં માત્ર ખેતીલક્ષી સ્ટાર્ટઅપ માટે સુવર્ણ તક મળી રહી છે.

અમદાવાદ દેશનું એક અગ્રણી વ્યાપારી હબ છે. સદીઓથી તે વેપાર અને વાણિજ્ય કેન્દ્રોનો ઇતિહાસ ધરાવે છે. જેમાં મોટી સંખ્યામાં વ્યવસાયો અને વ્યાવસાયિકોના હિતની સંભાળ રાખવા માટે એક છત્ર સંસ્થાનો અભાવ હતો. અમદાવાદ ચેમ્બર ઓફ કોમર્સ એન્ડ વેલ્ફેર ફાઉન્ડેશન એ ગુજરાત ટ્રેડર્સ ફેડરેશનનો એક ભાગ છે, જે ગુજરાતની ટ્રેડ અને બિઝનેસ ઍસોસિયેશનની સર્વોચ્ચ સંસ્થા છે અને હવે આ સંસ્થા દ્વારા એગ્રીકલ્ચરને લગતા સ્ટાર્ટઅપને વેગ આપવાનું નક્કી કરવામાં આવ્યું છે.

આપણે વાત કરવી છે એગ્રી સ્ટાર્ટઅપ એક્ઝિબિશનની જ્યાં માત્ર ખેતીને લગતા સ્ટાર્ટઅપની શરૂઆત કરવા ઇચ્છતા યુવાનોને એક એવું પ્લેટફોર્મ પૂરું પાડવામાં આવશે જ્યાંથી તે વિશ્વફલક સુધી પહોંચી શકે. તો બીજી બાજુ એવા સ્ટાર્ટઅપની વાત હશે જેમાં જગતના તાતની અનેક મુશ્કેલીનો હલ મળશે. ખેડૂતો પોતાની ઊપજને સીધી જ ગ્રાહકો સુધી પહોંચાડી શકશે, જ્યારે ગ્રાહકો ખેડૂતો સાથે સીધો સંપર્ક કરી ખરીદી કરી શકશે અને આ બંને વચ્ચે કડી બનશે એગ્રી સ્ટાર્ટઅપ.