கன்டெய்னரில் குங்குமப்பூ விவசாயம்!

உலகிலேயே விலைஉயர்ந்த நறுமணப்பொருள், குங்குமப்பூ. அமெரிக்காவில் ஒரு கிலோ குங்குமப்பூ ஐந்து லட்ச ரூபாய் வரை விலைபோகிறது.

- த.சக்திவேல்

சிவப்பு தங்கம் என்று அழைக்கப்படும் குங்குமப்பூவின் பிறப்பிடம் ஈரான் என்று நம்பப்படுகிறது. இன்றும் உலகில் உற்பத்தியாகும் குங்குமப்பூவில் 90 சதவீதத்தை உற்பத்தி செய்வது ஈரான்தான். இந்தியாவில் காஷ்மீரில் அதிகமாக குங்குமப்பூ விளைகிறது. இமாச்சலப் பிரதேசத்திலும் குங்குமப்பூ விவசாயம் ஜோராக நடக்கிறது.

இந்நிலையில் புனேவிலும் குங்குமப்பூவை விளைவிக்க முடியும் என்று கெத்து காட்டுகிறார் சைலேஷ் மோடக். அதுவும் சரக்குகளை அனுப்ப பயன்படுத்தப்படும் கன்டெய்னரில் ஹைட்ரோபோனிக்ஸ் முறையில் குங்குமப்பூவை விளைவிக்கிறார் இந்த விவசாயி. 

பணம் அச்சடிக்கும் நகரமான நாசிக்கில் வசித்துவந்த ஒரு நடுத்தரக் குடும்பத்தில் பிறந்தவர், சைலேஷ். ‘‘நல்லா படிச்சாதான் நிலையான வேலை கிடைக்கும். கை நிறைய சம்பாதிக்க முடியும்...’’ என்று பெற்றோர்களால் சொல்லிக்கொடுக்கப்பட்டு வளர்ந்த சைலேஷ், தான் 13 வருடங்களாக பார்த்து வந்த நல்ல வேலையை உதறிவிட்டு விவசாயியாக மாறியிருக்கிறார்.

புனே பல்கலைக்கழகத்தில் கம்ப்யூட்டர் சயின்ஸ் பாடத்தில் பட்டம் பெற்றவுடனே சைலேஷிற்கு ஈசிஎஸ் எனும் நிறுவனத்தில் மென்பொருள் பொறியாளர் வேலை கிடைத்துவிட்டது. வேலை நிமித்தமாக கம்போடியா, மலேசியா, உகாண்டா உள்ளிட்ட நிறைய நாடுகளுக்குப் பயணம் மேற்கொண்டார். 

இருந்தாலும் வேலையின் மீது முழு ஈடுபாட்டுடன் அவரால் இயங்க முடியவில்லை. அடுத்த சில வருடங்களில் புகழ்பெற்ற ஒரு நிறுவனத்தில் ஐம்பது பேரை வழிநடத்தும் குழுத் தலைவர் வேலை கிடைத்தது. சைலேஷின் வேலைத் திறனைப் பார்த்து பதவி உயர்வுகளும் தேடிவந்தன. ஆனால், காலையில் 9 மணிக்கு அலுவலகம் சென்று, 5 மணிக்கு வீடு திரும்பும் சுழற்சி அவருக்கு ஒருவித அலுப்பைக் கொடுத்தது.

பதிமூன்று வருடங்களாக பார்த்து வந்த வேலையை விடுவதாக முடிவு எடுத்தார் சைலேஷ். அவரது மனைவியைத் தவிர வீட்டிலிருந்த யாரும் சைலேஷின் முடிவுக்கு ஆதரவளிக்கவில்லை.