మోసం

మోసం

- ఇంద్రజీత్ కౌశిక్

“టిన్నీ చెప్పు, ఎలా సాగుతోంది జీవితం?" అని టిన్నీ నక్కని అడిగాడు జోజో తోడేలు.

“ఆ విషయం అడగకు అన్నయ్యా! పరిస్థితి మరీ దయనీయంగా ఉంది. మన అడవిలోని తెలివంతా మాయమైనట్లుంది. ఈ రోజుల్లో ఎవరినీ మోసం చేయడం అంత తేలిక కాదు. మన వలలో ఎవరూ పడకపోతే మనలాంటి జంతువులు ఎలా బతుకుతాయో?” నిట్టూరుస్తూ... విచారంగా జవాబిచ్చింది టిన్నీ.

“నువ్వు చెప్పింది నిజమే! మా పరిస్థితి అంతకంటే చాలా కఠినంగా ఉంది. పరిస్థితులు ఇలాగే కొనసాగితే, నా ప్రాణాలు పోతాయి" అన్నాడు జోజో.

వారు మాట్లాడుతుండగా బంటీ కోతి వారి వద్దకు వచ్చాడు. వారి సంభాషణ వింటూనే “ఇలా ధైర్యం కోల్పోవడం మంచిది కాదు. నాకు ఒక అద్భుతమైన ఐడియా తట్టింది. మీరు వింటానంటే చెబుతా... మీ ఇద్దరికీ వ్యాపారంలో తిరిగి రావడానికి నేను సహాయం చేయగలను” అని చెప్పాడు.

“ఇది అంత కష్టమైంది కాదు. చాలా ఈజీ. నువ్వు ఒక చిన్న పని చెయ్యాలి, మిగతావన్నీ నేను చూసుకుంటాను. దాంతో మీరు చాలా డబ్బు సంపాదించవచ్చు. నన్ను నమ్మండి" అంటూ బంటీ తన పథకాన్ని వివరించాడు.

కష్టపడకుండా, సునాయాసంగా డబ్బు సంపాదించాలన్న మాటలతో టిన్నీ, జోజోలు బంటీ చెప్పిన పని చేయడానికి అంగీకరించారు. బంటీ వారిద్దరిని ఓ రహస్య ప్రదేశానికి తీసుకెళ్లాడు.

మరుసటి రోజు, విరిగిన సైకిల్ వెనుక టిన్నీని కూర్చోబెట్టుకుని, జోజో కుంటుకుంటూ నడుస్తూ బాటసారుల వైపు చేతులు చాచి “దయచేసి ధర్మం చేయండి! పుణ్యముంటుంది. దయచేసి ఏదైనా ఇవ్వండి!” అంటూ అడుక్కోవడం మొదలు పెట్టాడు.

“ఏం జరిగింది? మీరిద్దరూ ఎందుకంత దిగులుగా కనిపిస్తున్నారు?” అని టిన్నీ కాలికి ఆ కట్టేంటి అని అటుగా వెళ్తున్న ప్రజలు ఆరా తీసారు. జోజోను కూడా ఎందుకు కుంటుతున్నావని?” అడగటంతో, జోజో ఏడుస్తూ “న్నీకి ప్రమాదంలో కాలు విరిగింది. నడవలేదు. నాకూ దెబ్బలు తగిలాయి అని చెబుతూ, మేమిద్దరం ఏమీ పని చేయలేము. బతుకు తెరువు కోసం అడుక్కుంటున్నాము” సమాధానం చెప్పాడు.

ఏడుస్తూ జోజో చెప్పిన మాటలు విని బాటసారులు వారిపై దయతో డబ్బులివ్వడం మొదలు పెట్టారు. టిన్నీ, జోజోలు కలిసి ఇలా డబ్బు సంపాదించసాగారు. సాయంత్రానికి బాటసారులు దయతో ఇచ్చిన డబ్బులతో వారి జేబులు నిండేవి.దాంతో జల్సా చేయసాగారు.