സ്വപ്നം കണ്ടതെല്ലാം സിനിമ മാത്രം

'ആവേശ'ത്തിലെ അമ്പാനിലൂടെ നമ്മുടെ പ്രിയനടനായി മാറിയ സജിൻ ഗോപുവിന്റെ വിശേഷങ്ങൾ

- രൂപാ ദയാബ്ജി

രോമാഞ്ചം ആഘോഷം

ജിത്തു സംവിധാനം ചെയ്ത രോമാഞ്ചത്തിലേക്ക് എന്നെ നിർദേശിച്ചത് സുഹൃത്തായ ജോൺ പോളാണ്. ആ സെറ്റിൽ വച്ചുതന്നെ ആവേശത്തിന്റെ കഥ പറഞ്ഞിരുന്നു. ഈ റോൾ പൊളിക്കുമെന്ന് അന്നേ മനസ്സിൽ തോന്നി. ചാവേറിന്റെ ലൊക്കേഷനിൽ ഇരിക്കുമ്പോഴാണു ജിത്തു വീണ്ടും വിളിക്കുന്നത്, "ആവേശം തുടങ്ങുന്നു. നേരേ വന്നോളൂ.' നേരേ ബെംഗളൂരുവിലെ ലൊക്കേഷനിലെത്തി. ഗുണ്ടയാകാനുള്ള വർക്ക് ഔട്ട് അവിടെ ചെന്നിട്ടാണു തുടങ്ങിയത്.

വലിയ കൃതാവും മീശയും അമ്പാന്റെ ട്രേഡ് മാർക്കാണ്, അലമ്പത്തരവും. കുറച്ചൊക്കെ കയ്യിൽ നിന്ന് ഇട്ടു. "അതൊക്കെ ചെയ്തോട്ടേ, ഷാൽ ഐ' എന്നു ചോദിക്കാനുള്ള സ്വാതന്ത്ര്യം എനിക്കുണ്ടു കേട്ടോ.

ആവേശം അർമാദം

രോമാഞ്ചം റിലീസ് ചെയ്തതിനു പിറകെ ഞങ്ങളെല്ലാം കൂടി എറണാകുളം കവിത തിയറ്ററിൽ പോയി. സിനിമ കഴിഞ്ഞു ഞങ്ങളെ കാണാൻ ആളുകൾ വന്നു പൊതിഞ്ഞു. റോഡൊക്കെ കുറേ നേരം ബ്ലോക്കായി. ആവേശം കാണാൻ തിയറ്ററിൽ പോകും മുൻപു സംവിധായകൻ ജിത്തു മാധവൻ ചോദിച്ചു, ആ സംഭവം ഓർമയില്ലേ.