કવર સ્ટોરી

રામકથાનું ગાન જ જીવન યશોદાદીદી

કપાળ પર રામાનંદી વૈષ્ણવ તિલક, ગળામાં પંચમાળા, આંગળીમાં ઓમઅંકિત વીંટી અને શ્વેત-પીળા રંગનાં વસ્ત્રોમાં સજ્જ... એ છે સાધ્વી યશોદાદીદી.

ડાંગ જિલ્લાના વઘઈ તાલુકાના મોટી દાબદર નામના નાનકડા ગામમાં ૧૯૮૫માં તુલસીબહેન અને દેવજીભાઈ ગધ્યાના ઘરે જન્મ. વારલી આદિવાસી સમાજના પરિવારજનોને કદાચ ખયાલ આવી ગયો હશે કે આ દીકરી અમને જશ અપાવશે એથી નામ પાડ્યું જશુ. ૧૨ ભાઈ-બહેન સાથે અછતમાં છતાં લીલુંછમ બાળપણ વીત્યું. ધાર્મિક ભાવના ધરાવતા પિતાએ ખેતીકામ કરીને આખા પરિવારને એક તાંતણે બાંધી રાખ્યો. ડોલવણ તાલુકાની પાઠકવાડી આશ્રમ શાળામાં સાતમા ધોરણ પછી આગળ શિક્ષણ શક્ય ન બન્યું. આ દરમિયાન ગામમાં રાષ્ટ્રીય સ્વયંસેવક સંઘ (આરએસએસ)ના સંઘ પ્રચારક સત્યવાનદાસ મહારાજ પધાર્યા. એમણે રામકથા તાલીમની વાત કરી, જે જશુને સ્પર્શી ગઈ. ૨૦૦૫માં અયોધ્યામાં જાનકી જીવન મંદિરમાં નવ મહિનાની તાલીમ પ્રાપ્ત કરીને જશુબહેન રામકથાનો રસ ભાવિકોને પીરસવા તૈયાર થઈ ગયાં.