વિઝા વિમર્શ

એલ-૧ વિઝા મેળવવાનાં પગલાં (૨)

- ડો.સુધીર શાહ

અનેક ભારતીયો અમેરિકામાં સ્થળાંતર કરવા નથી ઇચ્છતા, ત્યાં કાયમ રહેવાની એમની ઇચ્છા નથી હોતી. તેઓ અમેરિકામાં બિઝનેસ કરવાની ઇચ્છા ધરાવતાં હોય છે. આ માટે તેઓ ‘બી-૧બી-૨’ વિઝા મેળવીને, એક બિઝનેસમૅન તરીકે અમેરિકામાં પ્રવેશીને, ત્યાં છ-છ મહિના રહેતાં હોય છે અને બિઝનેસ કરતા હોય છે. છ મહિના પૂરા થતાં પહેલાં તેઓ અમેરિકા છોડીને ભારત પાછા આવી જાય છે અને ફરી પાછા ચાર-છ મહિના બાદ દસ વર્ષના મલ્ટિએન્ટ્રી ‘બી-૧બી-૨’ વિઝા ઉપર અમેરિકામાં પ્રવેશે છે અને એમણે ત્યાં સ્થાપેલ બિઝનેસ ફરી પાછો આગળ ધપાવે છે. આવું કરવું એ ગેરકાયદેસર છે. અનેકો આવું કરતાં પકડાય છે અને એમના ‘બી-૧/ બી-૨' વિઝા કૅન્સલ કરવામાં આવે છે. ત્યાર બાદ તેઓ આંતરકંપની ટ્રાન્સફરી મેનેજર, એક્ઝિક્યુટિવો અને ખાસ જાણકારીવાળી વ્યક્તિઓ માટેના ‘એલ-૧’ વિઝાની અરજી કરે, કાં તો અમેરિકાના રિજનલ સેન્ટરમાં આઠ લાખ ડૉલરનું રોકાણ કરીને ગ્રીનકાર્ડની અરજી કરે કે પછી યુરોપના કોઈ નાના દેશમાં રોકાણ કરીને, એ દેશની સિટીઝનશિપ મેળવીને એ સિટીઝન તરીકે અમેરિકાના ઇ-૨ વિઝાની માગણી કરે, ત્યારે એમણે આ પહેલાં ‘બી-૧ બી-૨’ વિઝા ઉપર અમેરિકામાં છ-છ મહિના રહીને ગેરકાયદેસર કાર્ય કર્યું હતું, એ કારણસર એલ-૧ વિઝા, ગ્રીનકાર્ડ કે પછી ઇ-૨ વિઝા આપવામાં નથી આવતા.