ફેમિલી ઝોન હેલ્થ

વૃદ્ધાવસ્થામાં પણ રહો શારીરિક અને માનસિક રીતે સ્વાવલંબી

- હેતલ ભટ્ટ

અંગ્રેજી ભાષાનું એક જાણીતું વાક્ય છે - ‘એજ ઇઝ જસ્ટ અ નંબર' એટલે કે ઉંમર તો માત્ર એક આંકડો છે. વ્યક્તિ તન અને મનથી તંદુરસ્ત હોય તો ઉંમરનો આંકડો મહત્ત્વ નથી રાખતો. ટૂંકમાં, વ્યક્તિ ગમે તેટલી ઉંમરે પણ ચુસ્ત અને સ્ફૂર્તિવાન રહી શકે છે, જો તે યોગ્ય રીતે સંતુલિત જીવનશૈલી અપનાવે. બદલાઈ રહેલી જીવનશૈલી અને પ્રદૂષણ, ભેળસેળ યુક્ત ખોરાક વગેરે જેવાં પરિબળોને કારણે વૃદ્ધાવસ્થાના ઉંબરે પહોંચતા લોકોમાં સ્વાસ્થ્યને લગતી ઘણી સમસ્યાઓ પણ જોવા મળે છે. નાની કે ઉંમર મોટી ઉંમરના લોકોને ઘૂંટણના દુખાવા, સંધિવા, ડાયાબિટીસ, કેન્સર, અસ્થમા, મેદસ્વિતા, બીપી વગેરે જેવી બીમારીઓ થવા લાગી છે. જોકે, ઉંમરના એક પડાવ પર પહોંચ્યા પછી સંયમિત જીવનશૈલી અપનાવીને શક્ય એટલું તંદુરસ્ત રહી શકાય છે. આધુનિક વિજ્ઞાન અને ચિકિત્સા જગતમાં ઘણી બધી સ્વાસ્થ્ય સમસ્યાઓનું સમાધાન મળી જ રહે છે, પણ વૃદ્ધોએ પણ ચિકિત્સા કે અન્ય લોકો પર સંપૂર્ણ રીતે નિર્ભર રહેવાને બદલે પોતાના જીવનમાં નાના-નાના ફેરફાર કરીને સારી આદતો સ્વીકારીને સ્વાવલંબી બનવાનો પ્રયત્ન કરવો જોઈએ. એ માટે કેટલીક નાની પરંતુ મહત્ત્વની આદતો કેળવવી જોઈએ.