ભૌતિકવાદના પૂરમાં ન તણાય એ જ સાચો ત્યાગી

ઝાલાવાડના હાસ્યકલાકારની પ્રતિજ્ઞા : આવકનો ૧૦૦ ટકા ભાગ દાનમાં આપીશ...

- હેમેન્દ્ર ભટ્ટ

ભારતીય સંસ્કૃતિમાં દાનનો અનેરો મહિમા છે. કર્ણથી લઈ ભામાશા જેવા દાનવીરોએ દેશકાળના સંજોગોવશ દાન કરી દાનની આ પરંપરાને ઊજળી બનાવી છે. દાનકર્મની આ પ્રણાલીને આજે પણ ઝાલાવાડના એક હાસ્યકલાકારે વિશિષ્ટ રીતે જાળવી રાખી છે અને પોતાની આવકના ૧૦મા ભાગ લેખે લાખો રૂપિયાનું દાન શિક્ષણ તેમ જ આરોગ્ય જેવી સમાજપયોગી સેવાઓ પાછળ કર્યું છે. હવે દાનનો આ આંકડો ૧૧ કરોડે પહોંચાડવા આ કલાકારે નેમ લીધી છે. જેની નોંધ વડાપ્રધાન નરેન્દ્ર મોદીએ પણ લીધી છે.

કહેવાયું છે કે જે વ્યક્તિ દાનકર્મ કરી જાણે એ જ ધનનો ખરો માલિક છે, બાકી તો બધા સંપત્તિના વૉચમેન (રખેવાળ) છે... આ વાત એવા એક હાસ્યકલાકારની છે કે જેમણે આ ઉક્તિને સાર્થક કરી છે. આ કલાકારનું નામ છે ‘જગદીશ ત્રિવેદી’. જેમણે જિંદગીનાં ૫૦ વર્ષ સુધી લોકોને હસાવ્યા છે, તે હાસ્યકલાકાર હવે સાચા અર્થમાં હસી ન શકતા લોકોને ખડખડાટ હસાવવા નીકળ્યા છે.